Mamlaka ya Elimu Tanzania inatarajia kukabidhi madawati 2000 kwa shule za Msingi 10

 Meneja Habari, Elimu na Mawasiliano toka Mamlaka ya Elimu Tanzania Bi Sylvia Lupembe akiongea na waandishi wa habari (Hawapo pichani) kuhusu jitihada wanazofanya kwa kushirikiana na wadau mbalimbali ili kukabiliana na changamoto katika sekta ya elimu,wakati wa mkutano uliofanyika leo jijini Dar es Salaam.Kushoto ni Mkuu wa kitengo cha Masoko na Uhusiano toka benki ya KCB Bi. Christina Manyenye.

Mkuu wa kitengo cha Masoko na Uhusiano toka benki ya KCB Bi. Christina Manyenye akiongea na waandishi wa habari (hawapo pichani) mipango waliyoiweka kwa kushirikiana na Mamlaka ya Elimu Tanzania katika kuendeleza na kuinua sekta ya Nchini.kushoto ni Meneja Sheria na Uhusiano toka kampuni ya uuzaji na usambazaji wa mafuta ya TOTAL Bi. Masha Msuya.

Afisa Rasilimali Fedha toka taasisi isiyo ya kiserikali ya Social Action Trust Fund (SATF) Bw. Timotheo Tenga akiwaeleza jambo waandishi wa habari( hawapo pichani) wakati wa mkutano uliofanyika leo Jijini Dar es Salaam. Kulia ni Meneja Sheria na Uhusiano toka kampuni ya uuzaji na usambazaji wa mafuta ya TOTAL Bi. Masha Msuya.

 Baadhi ya waandishi wa habari waliohudhuria mkutano huo wakiwasikiliza wawasilishaji toka Mamlaka ya Elimu Tanzania, KCB, TOTAL, Social Action Trust Fund (SATF) leo Jijini Dar es Salaam. PICHA NA HASSAN SILAYO-MAELEZO.

=======  ========

Frank Mvungi-Maelezo.

Mamlaka ya Elimu Tanzania inatarajia  kukabidhi madawati 2000 kwa shule za Msingi 10 zilizopo jijini Dara es salaam katika kukabiliana na Tatizo la upungufu wa madawati hapa nchini. Hayo yemesemwa na Meneja Habari Elimu na Mawasilano wa Mamlaka ya  hiyo Bi Sylvia Lupembe wakati wa mkutano na waandishi wa habari leo jijini Dar es salaam.

“Wanafunzi zaidi ya 6000 watanufaika na madawati hayo ambayo yatagharimu zaidi ya shilingi Milioni Mia Moja na Hamsini (150,000)” alisema Lupembe. Akifafanua Bi Lupembe amesema shule zitakazonufaika ni Chamazi, Mbande, Boko NHC, King’ong’o, Hekima, Bwawani, Bunju, Goba, Kombo na Kingugi.

Katika kuhamasisha wadau wengine kushiriki kwenye mchakato wa kuchangia madawati Bi Lupembe amesema kuwa Mamlaka ya Elimu Tanzania imezingatia rai iliyotolewa na Waziri Mkuu ikielekeza kuwa tatizo la madawati katika shule za msingi limalizike ifikapo mwezi Juni, 2015 kwa kulipa kipaumbele suala hilo. Pia Bi Lupembe alibainisha kuwa tathmini ya mwaka 2013 Tanzania ina upungufu wa madawati 1,147,471 hivyo ni jukumu la kila mdau kuunga mkono juhudi hizo ili kuondoa tatizo hilo kote nchini.

Naye Mkuu wa Kitengo cha Masoko na Mahusiano wa benki ya KCB Bi Christina Manyenye amesema wamekuwa wakishiriki katika kuchangia madawati ambapo kwa mwaka jana walichangia zaidi ya madawati 700.

“Tutaendelea kusaidia huduma za jamii katika maeneo mablimbali kama tunavyofanya katika sekta ya Elimu” alisisitiza Manyenye Mamlaka ya Elimu Tanzania kwa kushirikiana na Kampuni ya Mafuta ya TOTAL na wadau wengine kama Kenya Commercial Bank  (KCB), na Social Action Fund  wamekuwa katika ushirikiano tangu mwaka 2013 katika kutatua changamoto mbalimbali zinazoikabili sekta ya Elimu hapa nchini ikiwemo ya upungufu wa madawati.