TAMASHA LA PASAKA KUTIMIZA MIAKA 14 TANGU KUANZISHWA KWAKE NA MSAMA PROMOTIONS YA JIJINI DAR

TAMASHA la Pasaka mwaka huu limetimiza miaka 14 tangu kuasisiwa kwake na Kampuni ya Msama Promotions ya jijini Dar es Salaam imekuwa ikijiongezea umaarufu na kukubalika zaidi kutokana na ubunifu wake wa kufanya maadhimisho ya Sikukuu za Pasaka na Krismasi kwa umahiri na mguso wa kiroho kupitia matamasha hayo.

Umaarufu wa matamasha hayo pamoja na mambo mengine, unatokana na ukweli kuwa yamekuwa yakifanyika kwa ubunifu na umakini mkubwa huku kila mwaka yakiongezeka na kubadili waimbaji mbalimbali wa nyimbo za Injili wa ndani na nje ya nchi.

Imebainika kuwa tamasha hilo ni kivutio kwa watu mbalimbali kiasi cha kuwafanya kila linapoandaliwa Tamasha la Pasaka na Krismasi, Uwanja wa Taifa uliopo jijini Dar es salaam ambao umekuwa ukitumika kwa kazi hiyo, kufurika watu nao kutoka wakiwa na mioyo iliyotakasika kupitia nyimbo na waimbaji hao.

Hapana shaka kuwa ubunifu huu ndio ulichangia hata Serikali kupitia Waziri wa Habari, Vijana, Utamaduni na Michezo, Dk Fenela Mukangala, kumteua Mkurugenzi wa Msama Promotions, Alex Msama, kuwa Mjumbe wa Baraza la Sanaa la Taifa (BASATA).

Matamasha haya yanapambanuliwa na wadau mbalimbali ambao wanayaelezea ubora wake lakini wengi wanasema, yanapata umaarufu na mvuto kwa kuwa washiriki hususan waandalizi na wasanii (waimbaji), wanajiandaa na kujua kinachohitajika kwa jamii, hivyo kukiwasilisha kadiri ya mahitaji ya jamii.

Waimbaji mbalimbali wakiwamo wa kutoka nje ya nchi, wamekuwa wakikonga nyoyo za wananchi kwa kushirikiana vizuri na wazawa.

Sababu ya Kamati za Maandalizi za Matamasha haya kuleta waimbaji kutoka nje ni pamoja na hasa, kuleta ladha tofauti kwa nia ya kupata mahubiri au Neno la Mungu kwa ladha tofauti kutoka kwa waimbaji hao.