MZEE YUSSUF NA ISHA MASHAUZI WATHIBITISHA RASMI MTANANGE WA JAHAZI NA MASHAUZI CLASSIC

Hatimaye wakurugenzi wa Mashauzi Classic na Jahazi Modern Taarab, wamefanya mkutano na waandishi wa habari na kuthibitisha kuwepo kwa onyesho la pamoja la makundi hayo yenye nguvu katika muziki wa taarab.

 Onyesho hilo litafanyika mwezi huu Jumapili tarehe 22 ndani ya ukumbi wa Travertine Hotel Magomeni. Mkurugenzi wa Jahazi, Mzee Yussuf na mkurugenzi wa Mashauzi Classic, Isha Ramadhan maarufu kama Isha Mashauzi, wamesema siku hiyo hatumwi mtoto dukani. 

 Wakiongea katika mkutano huo wa waandishi wa habari uliofanyika Jumatatu jioni katika hotel ya Travertine Hotel, wakurugenzi hao ambao wote ni waimbaji nyota, wakasema onyesho hilo si mpambano lakini pia sio la masihara kwani kila bendi imejipanga kuhakikisha inaangusha burudani iliyokwenda shule.

Kutoka kushoto ni  Meneja wa Mashauzi Classic Ismail Rashid, Isha Mashauzi, Mzee Yussuf na Seif Magwaru meneja wa Jahazi Modern Taarab.